14 ივნისს საქართველოს ახალგაზრდა ეკონომისტთა ასოციაციამ ყაზბეგის განვითარების ჯგუფის (LAG Kazbegi) წევრებთან ჩაატარა სამუშაო შეხვედრა ყაზბეგის ახალგაზრდულ ცენტრში. 

შეხვედრის მიზანს წარმოადგენდა სოფლის განვითარებისათვის აქტუალური საკითხების განხილვა სპეციფიურად რეგიონის და ყაზბეგის ჭრილში და რეგიონული დანართებისათვის / თავებისთვის მნიშვნელოვანი მიმართულებების და პრიორიტეტების გამოკვეთა.

შეხვედრაზე საეა-ს პროექტის გუნდმა მონაწილეებს გააცნო სოფლის განვითარების სტრატეგიის ძირითადი პრიორიტეტები და დისკუსიის ფორმატში ყაზბეგის განვითარების ჯგუფის წევრებმა გამოავლინეს მათი აზრით რეგიონისთვის და ყაზბეგისთვის ძირითადი პრიორიტეტები, იმსჯელეს პრობლემებზე და მათი გადაჭრის გზებზე. ასევე შეაფასეს სოფლის განვითარების მიმართულებით განხორციელებული და მიმდინარე პროგრამები და პროექტები.

მონაწილეების მხრიდან გამოიკვეთა რომ ყაზბეგს აქვს მნიშვნელოვანი ეკონომიკური და ჯერ კიდევ აუთვისებელი პოტენციალი, რომელიც უნდა იქნას გათვალისწინებული ქვეყნის სტრატეგიული პრიორიტეტებისა და სოფლის განვითარების პროგრამების ინიცირების ეტაპზევე.

შეხვედრა ჩატარდა გაეროს განვითარების პროგრამა (UNDP) „სოფლის განვითარების სტრატეგიის დანერგვის ხელშეწყობა საქართველოში“ ფარგლებში.