27 თებერვალს საქართველოს ახალგაზრდა ეკონომისტთა ასოციაციის იმერეთის წარმომადგენლობის მიერ ჩატარდა პროექტის „ეფექტიანი კორპორაციული მმართველობა დასაქმებისათვის“ შემაჯამებელი ღონისძიება, სადაც წარმოდგენილი იყო პროექტის ფარგლებში ჩატარებული კვლევის შედეგები: „კორპორაციული ანგარიშგებების სისტემა საქართველოში - ევროკაშირთან ასოცირების ხელშეკრულებით აღებული ვალდებულებებისა და საქართველოს კანონმდებლობის აღსრულების შეფასება“.

შეხვედრის მონაწილეებს ასევე წარედგინათ პროექტის ფარგლებში მომზადებული საინფორმაციო ბიულეტენი: „კორპორაციული მართვის მნიშვნელობა და კორპორაციული ანგარიშგების სისტემა საქართველოში“.

დამსწრე პროფესიული საზოგადოებისა და მეწარმეების მონაწილეობით გაიმართა დისკუსია, საქართველოში თანამედროვე ეფექტიანი კორპორაციული მართვის სისტემის დანერგვის წინაშე არსებული გამოწვევებისა და იმ შესაძლებლობების შესახებ, რომელსაც ასეთი სისტემის დანერგვა ქმნის ბიზნესის განვითარებისათვის, დამატებითი სამუშაო ადგილების შექმნისა და საბოლოო ჯამში საზოგადოებრივი კეთილდღეობის გაუმჯობესებისათვის.

კვლევა ჩატარდა “საქართველოს სტრატეგიული კვლევებისა და განვითარების ცენტრის” მხარდაჭერით ევროკავშირისა და კონრად ადენაუერის ფონდის მიერ დაფინანსებული პროექტის "სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის" ფარგლებში.

პროექტს ახორციელებს კონსორციუმი კონრად ადენაუერის ფონდის (KAS), ხელმძღვანელობით შემდეგ არასამთავრობო ორგანიზაციებთან ერთად - საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების, განვითარების და დასაქმების ცენტრი (EDEC), და ევროპული პოლიტიკის ინსტიტუტი (IEP).